शिरूर येथील साई पॅथॉलॉजी लॅबचे संचालक दत्तात्रेय घाडगे यांचा ३६ वेळा रक्तदानाचा विक्रम — सर्व स्तरातून कौतुकाचा वर्षाव
शिरूर (प्रतिनिधी)
माणुसकीच्या सेवेसाठी दिलेलं रक्तदान हे जीवनदान असतं, आणि हेच अत्यंत प्रेरणादायक उदाहरण ठरले आहे शिरूर येथील साई पॅथॉलॉजी लॅबचे संचालक दत्तात्रेय घाडगे. त्यांनी आतापर्यंत ३६ वेळा रक्तदान करून एक वेगळा आदर्श समाजासमोर ठेवला आहे. त्यांच्या या समाजसेवेच्या उपक्रमाचे सर्व स्तरांतून भरभरून कौतुक केले जात आहे.
दत्तात्रेय घाडगे हे केवळ वैद्यकीय व्यवसायातच नव्हे, तर समाजकार्याच्या क्षेत्रातही सक्रिय आहेत. दर तीन महिन्यांनी नियमितपणे रक्तदान करत त्यांनी "रक्तदान हेच श्रेष्ठ दान" या उक्तीला सार्थ ठरवले आहे. रक्ताची गरज भासलेल्या वेळेस कोणालाही न सांगता मदतीस धावून जाणारे व्यक्तिमत्व म्हणून त्यांची ओळख निर्माण झाली आहे.
शहरातील अनेक सामाजिक संस्था, डॉक्टर्स असोसिएशन्स, आणि तरुण मंडळांकडून त्यांचा सत्कार करण्यात आला. विशेषतः युवकांमध्ये रक्तदानाविषयी जागरूकता निर्माण व्हावी यासाठी ते सातत्याने जनजागृतीही करत असतात.
दत्तात्रेय घाडगे यांचे म्हणणे आहे की, “रक्तदानाने कोणतेही नुकसान होत नाही, उलट एखाद्याचे प्राण वाचवण्याचे समाधान मिळते. प्रत्येक निरोगी व्यक्तीने पुढे येऊन नियमित रक्तदान करायला हवे.”
सामाजिक भान जपणाऱ्या आणि कृतीतून समाजसेवा करणाऱ्या दत्तात्रेय घाडगे यांच्यावर शहरवासीयांचा अभिमान असून, त्यांच्या या कार्यातून अनेकांना प्रेरणा मिळेल, यात शंका नाही.
