सणसवाडीत आले चक्क दोन भलेमोठे रानगवे
नागरी वस्तीत अचानक दोन रानगवे आल्याने खळबळ
शिरूर
( प्रतिनिधी ) शिरुर तालुक्यातील गणेगाव दुमाला परिसरात मागील आठवड्यात दोन रानगवे निदर्शनास आल्याने खळबळ उडालेली असताना आता ते दोन्ही रानगवे सणसवाडी परिसरात आल्याने यापूर्वी कधीही वास्तव्य नसलेल्या रानगव्याचे दर्शन झाल्याने खळबळ उडाली असून वनविभागाकडून नागरिकांना खबरदारीचे आवाहन करण्यात आले आहे.
सणसवाडी ता. शिरुर येथे आज सकाळच्या सुमारास दोन भलेमोठे रानगवे नागरी वस्ती जवळ फिरत असल्याचे दिसून आले, दरम्यान काही नागरिकांनी त्यांचे व्हिडिओ सोशल मिडियावर प्रसारित करताच त्या भगत नागरिकांची गर्दी होऊ लागली, याबाबतची माहिती शिरुर वन परिक्षेत्र अधिकारी निळकंठ गव्हाणे यांना मिळताच वनपाल गौरी हिंगणे, वनमजूर आनंदा हरगुडे, वनविभाग रेस्क्यु टीम मेंबर व निसर्ग वन्यजीव सामाजिक संस्थेचे अध्यक्ष शेरखान शेख, अमोल कुसाळकर, शुभम वाघ, नेचर गार्ड ऑर्गनायझेशन संस्थेचे अध्यक्ष गणेश टिळेकर, सचिव शुभांगी टिळेकर, बाळासाहेब मोरे यांनी सदर ठिकाणी धाव घेत नागरिकांना योग्य सूचना करत सदर प्राण्यांपासून लांब राहण्याच्या सूचना केल्या आहे, यावेळी बाजार समितीचे माजी सभापती अनिल भुजबळ, सणसवाडीचे उपसरपंच राजू दरेकर, सागर दरेकर, माजी ग्रामपंचायत सदस्य अनिल दरेकर, अमोल दरेकर, उद्योजक अक्षय भुजबळ यांसह आदी उपस्थित होते, तर वनविभागाच्या माहितीनुसार गव्यांच्या कळपातून दोन रानगवे वाट चुकून विखुरल्याचा अंदाज व्यक्त करण्यात आला आहे.
स्वतंत्र चौकट १ –
आपल्या भागात आलेले गवे रात्रीत जागा बदलत असून सध्या वनविभाग या रानगव्यांवर लक्ष ठेवून आहे मात्र नागरिकांनी त्यांना त्रास देऊ नये अथवा डिवचू नये, सदर घटनेबाबत वरिष्ठ अधिकाऱ्यांना माहिती दिलेली असून नागरिकांनी वनविभागाला सहकार्य करावे असे आवाहन शिरुर वन परिक्षेत्र अधिकारी निळकंठ गव्हाणे यांनी केले आहे.
