न्हावी ता.इंदापूर गावाचे शिवारात शेती मालात अंमली पदार्थाच्या निर्मितीसाठी बेकायदेशीर विनापरवाना लागवड करण्यात आलेल्या अफुच्या शेतीवर कारवाई करत एकूण २७ लाख ५६ हजार ४६० रूपये किंमतीची सुमारे ८८३ किलो ग्रॅम वजनाची बोंडासह अफुची झाडे जप्त करुन तिघांना अटक करण्यात आली आहे. सदर कारवाई स्थानिक गुन्हे शाखा व वालचंदनगर पोलिस स्टेशनच्या पथकाने केली आहे.
अंमली पदार्थ वनस्पतींची बेकायदेशीर विनापरवाना लागवड करून उत्पादन घेवून विक्री केल्यामुळे कमी कालावधीत झटपट पैसा कमविता येतो अशी धारणा लोकांमध्ये तयार झाली आहे. यातूनच कायद्याचा भंग करून काही लोक शेतीचे नावाखाली शेती मालात अफु, गांजा सारख्या अंमली पदार्थ निर्मिती करणाऱ्या वनस्पतींची बेकायदेशीरपणे विनारपरवाना लागवड करून उत्पादन घेत आहेत.
पुणे ग्रामीण जिल्हयाचे पोलीस अधीक्षक पंकज देशमुख यांनी अंमली पदार्थाचे उत्पादन, साठा, विक्री, सेवन करणारे इसमांवर कारवाई करण्याचे आदेश पुणे ग्रामीण पोलीसांना करून यामध्ये महत्त्वाची भूमिका बजाविणेबाबत स्थानिक गुन्हे शाखेस आदेशीत केले होते.स्थानिक गुन्हे शाखेचे पोलीस निरीक्षक अविनाश शिळीमकर यांनी त्याच्या पुणे ग्रामीण स्थानिक गुन्हे शाखेचे पथकाला आदेश दिले होते.
त्यानुसार बारामती उपविभागात गुन्हे प्रकटीकरणाचे काम पाहणारे स्थानिक गुन्हे शाखेचे पथक वालचंदनगर पोलीस स्टेशन हद्दीत अवैध व्यवसायांवर कारवाई करणेच्या उद्देशाने पेट्रोलिंग करत असताना दि. २१ फेब्रुवारी २५ रोजी
पथकातील पोलीस हवालदार स्वप्निल अहीवळे यांना गोपनीय बातमीदारामार्फत बातमी मिळाली न्हावी ता. इंदापूर जि. पुणे गावचे हद्दीत रतन कुंडलिक मारकड व बाळु बाबुराव जाधव यांनी त्यांचे मालकीचे शेतात बेकायदेशीरपणे विनापरवाना अफुच्या झाडांची लागवड विक्री करणेच्या उद्देशाने करून उत्पादन घेतले आहे, अशी बातमी मिळाली. सदर बातमीचा आधारे पोलिस निरीक्षक अविनाश शिळीमकर यांनी पोलीस अधीक्षक पुणे ग्रामीण यांना सांगितला त्यांचेकडून कारवाईचे आदेश प्राप्त करून स्थानिक गुन्हे शाखा, वालचंदनगर पोलिस स्टेशन कडील पोलीस अधिकारी व अंमलदार यांचे मदतीने उपविभागीय पोलीस अधिकारी बारामती उपविभाग यांचे परवानगी व आदेशान्वये राजपत्रीत अधिकरी, पंच तसेच महसुल विभाग, कृषी विभागाचे अधिकारी यांचेसह न्हावी गावात जावून मिळालेल्या बातमीचे आधारे नमुद संशईत इसमांचे शेतात जावून पाहणी करून कारवाई केली असता, शेतामध्ये रतन कुंडलिक मारकड (वय ५० वर्षे) बाळु बाबुराव जाधव, (वय ५४ वर्षे,दोघे रा. न्हावी ता. इंदापूर जि. पुणे) यांना ताब्यात घेण्यात आले. त्यांनी शेतांमध्ये अफूची बेकायदेशीर विनापरवाना लागवड केल्याचे आढळून आले, त्या दरम्यान त्याच परिसरातील कल्याण बाबुराव जाधव (वय ६५ वर्षे रा. न्हावी ता. इंदापूर जि. पुणे) हे त्यांचे शेतात उपस्थित असताना त्या शेताची पाहणी केली असता त्यांचे शेतांमध्ये देखील अफुची बेकायदेशीर विनापरवाना लागवड केल्याचे आढळून आल्याने त्यांना देखील ताब्यात घेण्यात आले. अफुची लागवड केलेली दिसून येवू नये याकरीता शेतात कांदा व लसून पिकांची लागवड करून चहु बाजूने मका या पिकाचे उत्पादन घेण्यात आलेले होते. कारवाई दरम्यान एकूण २७ लाख ५६ हजार ४६० रूपये किंमतीची सुमारे ८८३ किलो ग्रॅम वजनाची बोंडासह अफुची झाडे हस्तगत करणेत आलेली असून , वालचंदनगर पोलीस स्टेशन येथे गु.र.नं. ६९/२०२५ एन.डी.पी.एस. अॅक्ट कलम ८ व, १५, १८, ३२,४६ प्रमाणे गुन्हा नोंदविणेत आलेला आहे.
सदरची कारवाई पुणे ग्रामीण पोलीस अधीक्षक पंकज देशमुख, बारामती विभागाचे अपर पोलीस अधीक्षक गणेश बिरादार, यांचे मार्गर्शनाखाली बारामती उपविभागीय पोलीस अधिकारी सुदर्शन राठोड, यांचे आदेशान्वये स्थानिक गुन्हे शाखेचे पोलीस निरीक्षक अविनाश शिळीमकर, बारामती पोलिस स्टेशन पोलिस निरीक्षक वैशाली पाटील, वालचंदनगर पोलीस स्टेशनचे सहाय्यक पोलीस निरीक्षक राजकुमार डुणगे, स्थानिक गुन्हे शाखेचे सहाय्यक पोलीस निरीक्षक कुलदीप संकपाळ, सहाय्यक पोलीस निरीक्षक राहुल गावडे, पोलीस अंमलदार स्वप्निल अहीवळे, बाळासाहेब कारंडे, अभिजीत एकशिंगे, अजय घुले, ईश्वर जाधव, सचिन घाडगे, अजित भुजबळ, विजय कांचन, योगेश नागरगोजे, धिरज जाधव, दगडु विरकर, आसिफ शेख, रामदास बाबर, बाळासाहेब खडके, अमोल शेडगे, महेश बनकर, अतुल डेरे, मंगेश थिगळे, विभीषण सस्तुरे, वालचंदनगर चे पोलिस उप निरीक्षक विजय तेळकीकर, पोलीस अंमलदार रविंद्र पाटमास, बापू मोहिते, गुलाब पाटील, शरद पोफळे, विक्रमसिंह जाधव, अभिजीत कळसकर, गणेश बनकर बारामती तालुका महिला पोलीस अंमलदार स्मिता गायकवाड, मेघा शिंदे यांनी केली आहे.
