शिरूर प्रतिनिधी:
निमगाव म्हाळुंगी (ता.शिरूर) येथील युवा साहित्यिक व कवी आकाश हरिभाऊ भोरडे यांना पुणे येथील कुलस्वामिनी प्रतिष्ठान यांच्या वतीने दिला जाणारा गोंदण उत्कृष्ट साहित्य सन्मान पारितोषिक देऊन नुकतेच गौरविण्यात आले.
आधुनिक युगात माहिती व तंत्रज्ञान विकसित झाल्याने तसेच प्रत्येकाच्या हातामध्ये स्मार्टफोन आल्याने वाचन संस्कृती लोप पावत चालली आहे. समाजात वाचन संस्कृती रुजावी व विद्यार्थ्यांना वाचनाचे महत्त्व कळावे या उद्देशाने कुलस्वामिनी प्रतिष्ठान पुणे यांच्या वतीने गेले अकरा वर्षापासून गोंदण दीपावली विशेषांक प्रकाशित केला जातो. यांमध्ये महाराष्ट्रातील साहित्यिकांचे साहित्य मागवून निवड केली जाते. या निवडलेल्या साहित्यिकांना लेखनास अधिक प्रेरणा मिळावी व दर्जेदार लेखन करता यावे म्हणून उत्कृष्ट कथा, लेख व कवितेला गोंदण उत्कृष्ट साहित्य पुरस्काराने सन्मानित केले जाते. यावर्षी निमगाव म्हाळुंगी (ता.शिरूर) येथील युवा साहित्यिक व कवी आकाश हरिभाऊ भोरडे यांना गोंदण उत्कृष्ट साहित्य सन्मान देऊन गौरवण्यात आले. यावेळी आकाश भोरडे यांनी अतिशय कमी वयामध्ये साहित्य क्षेत्रात भरारी घेत सलग दोन वर्षे हे पारितोषिक पटकावण्याचा मान मिळवल्याचे कुलस्वामिनी प्रतिष्ठानच्या आयोजकांनी सांगितले.
यावेळी गोंदनचे संपादक पांडुरंग गाडीलकर, सहसंपादक दादाभाऊ गावडे, उज्वला पिंगळे, डॉ.नंदकुमार माळशिरसकर, चांगदेव पिंगळे, डॉ.हनुमंत भवारी, मनोहर मोहरे, मीनाक्षी पाटोळे, बापुसाहेब जाधव, डॉ.निलम गायकवाड आदि मान्यवर उपस्थित होते.
