शिक्रापूर येथील एकाला सोशल मीडियावरून ५० लाखांना गंडा....
ऑनलाइन पैसे गुंतवून नफा मिळवण्याची लालसा अंगलट
शिक्रापूर (ता. शिरूर) येथील एका व्यक्तीला सोशल मीडियावरून झालेल्या ओळखीतून एका परप्रांतीयाने ऑनलाइन पैसे गुंतवून जादा नफा देण्याचे आमिष दाखवित तब्बल ५० लाख ५० हजारांना गंडा घातल्याची घटना घडली.
याप्रकरणी शिक्रापूर पोलिस ठाण्यात मंगळवारी (दि. ८) गुन्हा दाखल करण्यात आला आहे.
याप्रकरणी सिरपा थापर (रा. लखनऊ, गौतमीनगर, उत्तर प्रदेश) असे गुन्हा दाखल झालेल्याचे नाव आहे.
याबाबत योगेश दिनकर पवार (वय ३५, रा. बजरंगवाडी, शिक्रापूर, ता. शिरूर) यांनी फिर्याद दिली आहे. पोलिसांनी दिलेल्या माहितीनुसार, शिक्रापूर येथील योगेश पवार यांना त्यांच्या फेसबुकवर सिरपा थापर याने मेसेज पाठवून व्यवसायाबाबत चर्चा केली. त्यानंतर त्याने ऑनलाइन गुंतवणूक करून लाखो रुपये नफा कमवत असल्याचे दाखवून योगेश
पवार यांना लिंक पाठवली आणि त्याद्वारे पैसे गुंतवण्यास सांगितले. योगेश यांनी त्या लिंकमध्ये ५० हजार रुपये गुंतवले असता दुसऱ्या दिवशी त्यांना १४ हजार रुपयांचा नफा मिळाल्याचे दिसले. त्यातून योगेश यांनी काही रक्कम काढून घेतल्याने त्यांना विश्वास बसला. त्यानंतर योगेश यांनी सिरपा थापरने दिलेल्या खात्यावर बँकेतून वेळोवेळी ५० लाख रुपये पाठवले. मात्र त्यानंतर थापरने पाठवलेली लिंक ओपन होत नसल्याचे लक्षात आल्याने योगेश यांनी त्याच्याशी संपर्क करत मला पैसे काढायचे असल्याचे सांगितले. मात्र तुमच्या खात्यावर एक कोटी रुपये झाल्याशिवाय पैसे काढता येणार नसल्याचे सांगत सिरपाने बोलण्यास टाळाटाळ केली. त्यानंतर सिरपाशी संपर्कही होत नसल्याने आपली फसवणूक झाल्याचे पवार यांच्या लक्षात आले. पोलिस निरीक्षक दीपरतन गायकवाड यांच्या मार्गदर्शनाखाली सहायक पोलिस निरीक्षक संदीपसाळुंखे हे तपास करत आहे
