उपवासाला भगरीची पिठापासून बनवलेली भाकर खाल्ल्याने शिरूर तालुक्यातील पूर्व भागांतील ५० महिलांना विषबाधा झाली आहे. यामुळें खळबळ उडाली आहे तर यात काही पुरुषांनाही विषबाधा झाली.
नवरात्रोत्सव उत्सव काळात अशाप्रकारे अनेक ठिकाणी विषबाधा झाल्याच्या घटना घडल्या आहेत परंतू अन्नभेसळ प्रशासन याबाबत कार्यवाही करीत नसून, दुर्लक्ष करीत आहे.तालुक्यातील मांडवगण फराटा, इनामगाव, तांदळी, गणेगाव दुमाला, बाभूळसर बुद्रुक या गावांतील सुमारे ४५ ते ५० महिलांना विषबाधा झाली आहे.
शुक्रवारी महिलांनी भगरीच्या पिठाची भाकर खाल्ल्याने त्यांना मळमळ व उलटी होऊ लागल्याने महिलाना तत्काळ श्रीगोंदा तालुक्यातील काष्टी, इनामगाव व मांडवगण फराटा येथील खासगी दवाखान्यात उपचारासाठी दाखल करण्यात आले असून, सध्या या सर्व महिलांची प्रकृती स्थिर आहे.
शिरूर तालुक्याच्या पूर्व भागात अनेक दुकानात बनावट व मुदत संपलेल्या भगरीची विक्री झाल्यामुळे अनेक महिलांना विषबाधा झाली असत्याचा अंदाज आहे. दुकानात असलेल्या उपवासाच्या पदार्थाची अन्न व भेसळ प्रशासनाने त्वरित पाहणी करावी. या प्रकरणातील दोषी दुकानदारांवर प्रशासनाने कारवाई करावी.
संपत फराटे, अध्यक्ष, अखिल भारतीय ग्राहक पंचायत शिरूर
भगर घेताना मुदत संपलेल्या तारखेची भगर घेऊ नये. उपवासाला तयार केलेले पदार्थ घेणे शक्यतो टाळावे.विषबाधा झालेल्या रुग्णांमध्ये आतापर्यंत सर्वात विचित्र लक्षणे पाहायला मिळाली. महिलांनी उपवासाच्या काळात घरच्या घरी पदार्थ बनवून खाण्यावर भर द्यावा.
-डॉ. अतुल सुराणा, मांडवगण फराटा, ता. शिरूर
