तळेगाव ढमढेरे ता. शिरुर येथील एका सोसायटीच्या पार्किंग मध्ये लावलेली कार रात्रीच्या सुमारास अचानक आग लागून खाक होऊन शेजारील एका कारचे नुकसान झाल्याची घटना घडली असल्याने शिक्रापूर पोलीस स्टेशन येथे जळीत बाबत नोंद करण्यात आली आहे.
तळेगाव ढमढेरे ता. शिरुर येथील त्रिमूर्ती मंगल कार्यालय जवळ असलेल्या एका सोसायटीमध्ये राहणाऱ्या गायत्री तळेले यांनी त्यांची एम एच १२ व्ही झेड २०३१ हि कार सोसायटी खालील पार्किंगमध्ये पार्क करुन ठेवलेली असताना रात्री अचानक कारला आग लागल्याचे शेजारील नागरिकांना दिसल्याने त्यांनी गायत्री यांचा दरवाजा वाजवून त्यांना उठवले, दरम्यान पाहणी केली असता पार्किंग मधील एका कारला आग लागून काही नागरिक आग विझवत होते, मात्र यावेळी गायत्री तळेले यांची कार पूर्णपणे जळून खाक झाली तसेच शेजारी असलेली एम एच ४२ बी ई ६७६३ हि कार काही प्रमाणात जळून तिचे नुकसान झाले, दरम्यान आग कशामुळे लागली हे समजू शकले नसून याबाबत गायत्री गौरव तळेले वय २६ वर्षे रा. आपले घर सोसायटी तळेगाव ढमढेरे ता. शिरुर जि. पुणे मूळ रा. विवरा बुद्रुक ता. रावेर जि. जळगाव यांनी शिक्रापूर पोलीस स्टेशन येथे खबर दिल्याने पोलिसांनी आकस्मात जळीत बाबत नोंद केली असून पुढील तपास पोलीस निरीक्षक दिपरतन गायकवाड यांच्या मार्गदर्शनाखाली पोलीस हवालदार संदीप इथापे हे करत आहे.
फोटो खालील ओळ – तळेगाव ढमढेरे ता. शिरुर येथे जळून खाक झालेली कार.
