शिरुर तालुक्यात कोरेगाव भिमातील खळबळजनक प्रकार
कल्याणी फोर्ज कंपनीने ऑईल जमिनीत सोडल्याचा स्थानिकांचा आरोप
( प्रतिनिधी ) कोरेगाव भीमा ता. शिरुर येथील एका नागरिकाने जमिनीमध्ये घेतलेल्या बोअरवेल पाण्या ऐवजी चक्क ऑईल मिश्रित पाणी बाहेर येण्याचा प्रकार समोर आल्याने खळबळ उडाली असून जवळील कल्याणी फोर्ज कंपनीने ऑईल जमिनीत सोडल्याचा आरोप स्थानिक नागरिकांनी केला आहे.
कोरेगाव भीमा ता. शिरुर येथील कल्याणी फाटा परिसरातील ज्ञानेश्वर ढेरंगे यांनी त्यांच्या जमिनीमध्ये बोअरवेल घेतला, जमिनीत काही खोलवर बोअरवेळ गेल्यानंतर जमिनीतून पाण्या ऐवजी चक्क ऑईल मिश्रित पाण्याचे फवारे उडू लागले बरेच वेळ पाहिल्यानंतर देखील जमिनीतून ऑईलच येत असल्याने नागरिक हैराण झाले, यावेळी जवळील कल्याणी फोर्ज कंपनीच्या प्रतिनिधींना देखील बोलावण्यात आले, बरेच वेळ पाहणी केल्यानंतर देखील जमिनीतून फक्त ऑईल बाहेर येऊन ऑईलचे पाट वाहू लागल्याने स्थानिक हैराण झाले दरम्यान कंपनीतून आलेल्या प्रतिनिधींनी सदर ऑईल मिश्रित पाण्याचे नमुने बॉटल मध्ये घेतले असता बॉटल अक्षरशः काळी झाली, यापूर्वी देखील एका बोअरवेल बाबत असाच प्रकार घडलेला असून जवळील एका विहिरीला सुद्धा पाण्याचा तवंग आल्याने आमचे आरोग्य धोक्यात आले असल्याचे स्थानिकांनी सांगितले असून येथील पाण्याने आंघोळ केल्यास अंगाला देखील खाज येत असल्याचे स्थानिक नागरिकांनी सांगितले, तर याबाबत बोलताना आपण घडलेल्या प्रकाराबाबत आपण कंपनीकडे वारंवार तक्रार केली असून ते प्रतिसाद देत नसून आपण याबाबत प्रदूषण नियंत्रण महामंडळ कडे तक्रार करणार असल्याचे ज्ञानेश्वर ढेरंगे यांनी सांगितले.
स्वतंत्र चौकट १ –
कोरेगाव भिमातील कंपनी शेजारील बोअरवेल मधून ऑईल येत असल्याची माहिती मिळाल्यानंतर आम्ही पाहायला आलो असून आमच्या कंपनीतील वेस्टेज ऑईल आम्ही बाहेर पाठवत असतो मात्र याबाबत मी काहीही बोलू शकत नसल्याचे कल्याणी फोर्ज कंपनीचे अॅडमीन मॅनेजर गणेश शिंदे यांनी सांगितले.
फोटो खालील ओळ – कोरेगाव भीमा ता. शिरुर येथे बोअरवेल मधून पाण्या ऐवजी आलेले काळे ऑईल.
