मांडवगण फराटा ता.शिरूर येथे आईबरोबर उभा असलेल्या सात वर्षीय मुलावर बिबट्याने झडप घालून आई समोर उचलून नेल्याची घटना घडली असून यात मुलाचा बिबट्याच्या हल्ल्यात दुर्दैवी मृत्यू झाला आहे.
यामुळे मांडवगण परिसरात हळहळ व्यक्त करण्यात आली असून भीतीचे वातावरण ही निर्माण झाले आहे.
या भागात तातडीने वनविभागाने पिंजरा लावून या नरभक्षक बिबट्याला पकडण्यासाठी पिंजरा लावावा अशी संतप्त मागणी नागरिकांमधून होत आहे.
वंश राजकुमार सिंग (वय ७, रा. मांडवगण फराटा तालुका शिरूर) असे बिबट्याच्या हल्ल्यात मृत्युमुखी पडलेल्या बालकाचे नाव आहे.
संदिप अशोक घाडगे (वय ५५ वर्ष व्यवसाय शेती व गुळउदयोग रा. दगडवाडीरोड गोकुळनगर मौजे मांडवगण फराटा ता. शिरूर जि पुणे) यांनी फिर्याद दिली आहे.
याबाबत सविस्तर असे कि, मांडवगण फराटा येथील दगडवाडी रोड, गोकुळनगर येथे संदीप अशोक घाडगे यांचे उसाचे गुऱ्हाळ आहे. या गुऱ्हाळवर राजकुमार नथू सिंग हे कुटुंबासमवेत कामाला आहेत. राजकुमार सिंग व त्यांची पत्नी रेखा यांच्यात शुक्रवारी घरी असतानाच घरगुती कारणावरून किरकोळ वाद सुरू होता. रात्रीच्या वेळी सव्वा नऊ ते पावणे दहाच्या दरम्यान आई पुढे चालत असताना मागुन त्यांचा वन्स हा मुलगा येत होता. आईने मागे येणा-या मुलाचा जोराचा रडण्याचा आवाज पाहिला असता त्यावेळी त्यांना बिबट्या निदर्शनास आला. यावेळी बिबट्याने आईच्या डोळ्यासमोरच चिमकल्यावर हल्ला करत उसाच्या शेतात फरफटत नेले. त्यानंतर आईने मोठ्याने आरडाओरडा केला. यावेळी उपस्थित असणा-या गु-हाळ कामगार, उसतोड कामगार व उपस्थित असणा-यांनी शोध घ्यायचा प्रयत्न सुरु केला. दरम्यान पोलिस व वनविभागाला ही कळविण्यात आले. राजी उशिरा चिमुकल्याला गंभीर जखमी अवस्थेत शोधण्यात यश आले. दवाखान्यात उपचारांसाठी नेण्यात आले मात्र उपचारापूर्वीच मुलाचा मृत्यू झाल्याचे डॉक्टरांनी सांगितले.याबाबत गुऱ्हाळचालक संदीप अशोक घाडगे यांनी पोलिसांत खबर दिली आहे. शिरूर पोलीस स्टेशन करण्यात आली असून पुढील तपास मांडवगण आउट पोस्ट पोलीस फौजदार रमेश कदम करीत आहे.
घटनास्थळाला शिरूर वनपरिक्षेत्र अधिकारी कंक यांनी भेट दिली असून या भागामध्ये आतापर्यंत सात पिंजरे लावले असून आणखी पाच पिंजरे लावणार असल्याचे सांगून या भागात सीसीटीव्ही कॅमेरे लावण्याचे काम सुरू आहे त्यामार्फत या नर भक्षक बिबट्यावर नजर ठेवणार असल्याचे त्यांनी सांगितले.
